Əkinçilik Elmi-Tədqiqat İnstitutunun əməkdaşı dünyasını dəyişib
KTN Əkinçilik Elmi-Tədqiqat İnstitutunun əməkdaşı Hüseynov Seyfulla İmaməli oğlu 68 yaşında dünyasını dəyişib.
Qeyd edək ki, Hüseynov Seyfulla İmaməli oğlu 1955-ci il may ayının 20-də Ermənistan Respublikası Vedi rayonunun Şidli kəndində anadan olub. 1961-1971-ci illərdə Vedi rayonunun Şidli kənd orta məktəbində təhsil alıb.
1972-ci ildə S.M.Kirov adına Azərbaycan Dövlət Universitetinə (hazırda Bakı Dövlət Universiteti) daxil olub, 1977-ci ildə oranı bitirib, kimyaçı və kimya müəllimi ixtisasına yiyələnib.
1980-ci ildə Azərbaycan Elmi-Tədqiqat Əkinçilik İnstitutunun Bitki fiziologiyası laboratoriyasında “Biokimya” ixtisası üzrə əyani aspiranturaya qəbul olub. 2006-cı ildə TIKA təşkilatının xətti ilə Türkiyənin Ankara şəhərində Torpak və bitki araşdırmaları institutunda biokimya ixtisası üzrə laboratoriyaların modernləşdirilməsi ixtisasartırma tam kursunu keçib və sertifikat alıb. 1989-cu ildə 03.00.04-Biokimya ixtisası üzrə “Sort xüsusiyyətindən və becərmə şəraitindən asılı olaraq soya dəninin biokimyəvi xarakteristikası” mövzusunda dissertasiya işini müdafiə edib və biologiya üzrə fəlsəfə doktoru elmi dərəcəsi alıb.
1977-ci ildə Azərbaycan Elmi-Tədqiqat Əkinçilik İnstitutunun Bitki fiziologiyası laboratoriyasında kiçik elmi işçi vəzifəsində işə başlayıb.
1991-ci ildə Texnologiya və biokimya laboratoriyasında elmi işçi vəzifəsində işləyib. 1991-ci ildə Respublika Layihə Axtarış stansiyasında Toksikologiya laboratoriyasın müdiri vəzifəsində işləyib.
1993-cü ildə Azərbaycan Elmi-Tədqiqat Əkinçilik İnstitutunun Texnologiya və biokimya laboratoriyasında böyük elmi işçi və 1995-ci ildən həmin laboratoriyada aparıcı elmi işçi vəzifəsinə təyin edilib.
14 iyun 2018-ci il tarixində Azərbaycan Respublikasının Prezidenti yanında Ali Attestasiya Komissiyası tərəfindən 03.00.04 “Biokimya” ixtisası üzrə dosent elmi adına layiq görülüb.
Gözəl insan, istedadlı alim, biologiya üzrə fəlsəfə doktoru, dosent Seyfulla Hüseynovun əziz xatirəsi Əkinçilik Elmi-Tədqiqat İnstitutunun kollektivinin qəlbində daim yaşayacaq!
Allah rəhmət eləsin!