Lənkəran rayonunda Azərbaycan Respublikası (AR) Kənd Təsərrüfatı Nazirliyi (KTN) və Əkinçilik Elmi-Tədqiqat İnstitutunun (ƏETİ) birgə təşkilatçılığı ilə “Çəltiyin seleksiyası və toxumçuluğunun təşkili” mövzusunda tarla seminarı keçirilib.

Tədbirdə ölkəmizdə çəltikçiliyin elmi əsaslarla inkişaf etdirilməsi baxımından çəltikçilik sahəsində mövcud problemlərin aradan qaldırılması, çəltik bitkisinin əkin sahələrinin artırılması, məhsuldarlığın və məhsulun keyfiyyətinin yüksəldilməsi, ixrac yönümlü, rəqabət qabiliyyətli məhsul istehsalı, idxaldan asılılığın aradan qaldırılması və s. məsələlərə toxunulub.

KTN “Bitkiçiliyin təşkili və monitorinqi” şöbəsinin müdiri İmran Cümşüdov “Çəltikçiliyin Ərzaq Təhlükəsizliyinin təmin edilməsində əhəmiyyəti”, ƏETİ-nin direktoru Faiq Xudayev “Çəltikçilik üzrə Dövlət Proqramının icra vəziyyəti”, Lənkəran Dayaq Məntəqəsinin müdiri Təyyub Rzayev “Çəltiyin becərmə texnologiyası”, ƏETİ-nin “Bitki seleksiyası” şöbəsinin müdiri Abidin Abdullayev “Yeni sortların yaradılması və toxumçuluğun təşkili” mövzuları üzrə çıxış ediblər.

Respublikada ilk dəfə olaraq çəltiyin seleksiya işlərinin aparılması, toxumçuluğunun təşkili, super elit və elit toxum istehsalı fermerlər tərəfindən müsbət qiymətləndirilib. Çəltikçilik sahəsində sertifikatlı toxum istehsalının həyata keçirilməsi və toxumla bağlı çətinliklərin yaxın zamanda həllini tapacağı iştirakçıların diqqətinə çatdırılıb.

Tədbirdə iştirak edən mütəxəssis və fermerlər çəltik əkin sahələrinə baxış keçiriblər. Fermer və sahibkarlarla danışıqlar və müzakirələr aparılıb, müvafiq tövsiyələr verilib.

Tədbirdə KTN-nin, AXA-nın, Dövlət Toxum Fondunun, bölgə DAİM-lərinin nümayəndələri, çəltikçiliklə məşğul olan mütəxəssislər və bölgə fermerləri iştirak ediblər.

Tədbirin məqsədi Dövlət Proqramından irəli gələn məsələlərin həlli istiqamətində qarşıda duran vəzifələrin və tədbirlərin həyata keçirilməsindən ibarət olub.